沙特開5倍人工　孫興民點選擇？

熱刺隊長孫興民明夏約滿，熱刺只肯啟動延長一年合約條款，欠缺吸引力，更被韓媒批評為「不幸」，據報有沙特球隊向「孫仔」招手，開出5倍人工，佢會點選擇？

2015年加盟熱刺嘅孫興民，至今踏入第10個球季，不過其隊中地位不斷下降，近期更多次提前被換出，再非球隊必然主力。作為亞洲球員，孫興民喺隊中嘅話語權同威望亦只屬一般，依家球隊只願意同佢延長合約一年，而並非同佢對話談傾續約，誠意欠奉。

有分析認為，32歲嘅孫興民應該慎重考慮在現階段尋求生涯最後一張大合約，為掛靴作準備，然而呢個訴求好難在熱刺實現，即使自動延長合約一年，到來季約滿後都好大機會解約。

有消息指，沙特球隊對呢位亞洲天王甚感興趣，開出年薪6,000萬歐元(約5億港元)條件，周薪約為960萬港元，比孫興民現時在熱刺嘅周薪19萬鎊(約190萬港元)高出5倍，轉戰沙特似乎係一條唔錯嘅出路，值得思考。