夏蘭特入波率挪威大勝　媲美轟炸機梅拿

周五(15日)凌晨歐國聯B3組賽事，挪威作客4比1大破斯洛文尼亞，繼續擔任隊長嘅艾寧夏蘭特又有波入，佢喺國家隊上陣38場入35球，係自德國傳奇「轟炸機」梅拿後，歐洲最強前鋒！

雖然馬田奧迪加特缺陣，不過挪威表現唔失禮，紐沙開波4分鐘先拔頭籌，主隊21分鐘由施斯高入12碼追平，不過艾寧夏蘭特完半場前接應辛達貝治靚直線，單刀射入再為挪威領先；下半場紐沙同侯治分別建功，助挪威大勝4比1，依家同奧地利一樣5戰得10分，因對賽成績較差排第2位。

艾寧夏蘭特上個月成為挪威國家隊史上入波最多球員，今場入波又刷新紀錄，佢38場國際賽入35球，係自1972年德國傳奇梅拿後(38場入43球)，近52年來歐洲同時期(頭38場)入波最多球員。艾寧夏蘭特賽後表示：「我哋今場踢得好好，紐沙係個好出色嘅球員，挪威有佢係個榮幸。領隊今場改變咗少少戰術，但就有好大嘅效果，領隊功勞最大。」