東網電視
更多新聞短片
艾摩廉被告知冇錢增兵。(Getty Images)
魯賓艾摩廉成為曼聯新主帥，外間充滿期望，不過佢上任首個難題就係冇錢增兵，據報曼聯過去3年畀坦哈格增兵使咗6億鎊(約59億港元)，英力士集團接管後大幅削減開支，加上財務公平條例影響，艾摩廉做咗光棍司令，簽唔到自己心儀球員。
英國傳媒報道，曼聯過去3年用咗6億鎊簽球員，單單今夏就用咗2億鎊，轉會預算已經畀坦哈格用晒，但球隊成績低落，最終炒咗坦哈格，而新接手嘅艾摩廉已被告知冇錢簽人，只能用現有球員比賽。
報道指，曼聯管理層相信，現有班底在英超有足夠競爭力，只係之前發揮唔到，並期望艾摩廉能夠發掘現有球員潛力，例如曼紐爾烏加迪、蘭尼約路、美臣蒙特，仲有海倫，希望呢班球員喺艾摩廉訓練下不斷進步。
曼聯過去3季稅前虧蝕高達3.129億鎊(約30億港元)，為遵守英超財務公平條例，艾摩廉呢段時間只能「硬食」，用現有人腳爭取好成績。
