韋斯咸反彈打「鵲」　雲比沙卡鐵樹都開花

周二(26日)凌晨英超獨腳戲，今季成績沉淪嘅韋斯咸大踢爭氣波，作客2比0擊敗紐卡素，令飽受下台壓力嘅領隊盧比迪古暫鬆一口氣。韋斯咸今場踢出代表作，連右閘雲比沙卡都「鐵樹開花」入波，有望打起信心重返正軌。

韋斯咸季前大事擴軍後竟捲入護級漩渦，賽前有傳領隊盧比迪古只得2場機會「保飯碗」，果然球隊大踢爭氣波，雖然被紐卡素壓住打，但湯馬士蘇錫克10分鐘接應角球頂入，53分鐘再憑雲比沙卡入楔禁區射成2比0，呢球係雲比沙卡相隔3年零9個月後首次入波，為韋斯咸鎖定寶貴勝仗。

今夏由曼聯加盟嘅雲比沙卡賽後表示：「好榮幸拎到喺韋斯咸首個入波，而且全隊表現出色，當時我喺禁區一心諗住盡快起腳，好彩個波最後入咗網。」韋斯咸周日(1日)凌晨會主場迎戰阿仙奴，不過盧比迪古今場食黃牌，今季累積3黃要停賽，未能落場督師。