東網電視
更多新聞短片
雲尼斯達萊將成李斯特城主帥。(Getty Images)
半個月前被曼聯踢走嘅雲尼斯達萊，將會極速回歸英超！據Fabrizio Romano同各大英國媒體消息，雲尼斯達萊已同意李斯特城開出聘約，將會代替日前被炒嘅谷巴出任領隊，目標係帶領「狐狸」護級。
雲尼斯達萊今夏加盟曼聯做助教，喺坦哈格被炒後曾以看守領隊身份領軍4場，拎到3勝1和佳績，雖然佢多次公開表示想繼續留喺曼聯做教練，不過魯賓艾摩廉決定用番自己班底，雲佬亦慘被炒魷。
時隔半個月，48歲嘅「雲佬」決定重返英超教李城，Romano報道：「雙方已達成協議，文件都簽好，佢將成為李城新領隊。」據報「雲佬」目前身處荷蘭，未知趕唔趕得切喺周六(30日)作客賓福特領軍。
「雲佬」只有一次「正式」執教經驗，22/23球季帶領燕豪芬拎到荷蘭盃冠軍，有趣嘅係佢之前帶曼聯嘅3場勝仗，有2場就係贏依家執教嘅李斯特城，間接令到谷巴被炒魷。
