東網電視
更多新聞短片
京士利高文拉傷肌肉。(Getty Images)
拜仁慕尼黑喺周六(7日)晚德甲主場以4比2擊敗海登咸，翼鋒京士利高文後備上陣，踢咗20分鐘就受傷退下火線，預料無法出戰周三(11日)凌晨歐聯作客薩克達，甚至可能缺陣今年餘下賽事。
拜仁慕尼黑首席射手哈利卡尼養傷之下，35歲老將湯馬士梅拿客串前鋒位置，但無損攻力，開賽18分鐘，中堅烏柏美卡奴頂入角球打開紀錄。不過，換邊後冇耐，烏柏美卡奴回傳失誤，被對手漢沙克射入空門扳平。
幸好拜仁勝在多攻勢，穆斯亞拿勁射入網迅速再次領先，另1位中場哥列斯卡亦入1球，即使海登咸憑多斯治入波追番1球，但補時階段，穆斯亞拿單刀射入，為拜仁奠定4比2勝局，近7場聯賽取得6勝1和，加上第2位法蘭克福只能打和奧格斯堡2比2，令榜首拜仁有6分領先優勢。
不過，拜仁亦有壞消息，京士利高文71分鐘後備上陣，踢到補時拉傷肌肉退下火線，由於拜仁今年只剩下3場比賽，呢位法國國腳可能要等到明年先至復出。
