普巴暗示有球會收留　高爾支持佢重返曼聯

法國球星保羅普巴服食禁藥一案，經上訴後獲得減刑，下月可以參加操練，明年3月復出比賽，但仍被祖雲達斯解約，現時未有球會收留。呢位31歲中場剛於社交網上載3個emoji圖案，似乎暗示有新着落，曼聯傳奇「黑雙煞」前鋒高爾，認為普巴可以重返紅魔鬼，仍然有能力作出貢獻。

普巴上載3個emoji圖案包括沙漏、封嘴、扮鬼臉，似乎代表由倒數、保持沉默，到現時放鬆心情，外界推測佢可能簽到新球會，早前傳出法甲勁旅馬賽及多支沙特阿拉伯球隊有興趣招攬普巴加盟，甚至同前度球會曼聯扯上關係。

高爾支持普巴重投曼聯：「普巴仲可唔可以效力曼聯？佢係一位能力出眾嘅球員，可以喺任何球隊立足，佢踢番英超，可以令整個聯賽變得更美好，只要普巴恢復最佳狀態，大把球會爭住簽佢。」不過，曼聯新股東拉特克利夫要求只簽25歲以下球員，普巴已超齡，恐怕回巢機會非常渺茫。