信心爆棚　皇馬傷兵隨行等捧盃

皇馬公布出戰下周四(19日)凌晨洲際盃決賽嘅大軍名單，所有一隊球員全部入選，包括5位無法上陣嘅傷兵基利安麥巴比、丹尼爾卡華積、艾達米列達奧、阿拉巴、費蘭特文迪都有隨行，睇來「銀河艦隊」奪冠信心爆棚，搵齊人到時影捧盃大合照。

今屆洲際盃喺卡塔爾舉行，上屆歐聯冠軍皇馬地位超然，直接入決賽，將會迎戰帕丘卡對艾阿里嘅勝方。呢支西甲豪門受到傷兵問題困擾，射手基利安麥巴比上場歐聯受傷，需要抖10日，無緣上陣踢洲際盃，2位後衞丹尼爾卡華積、艾達米列達奧早前已重傷提早收咧。

不過，會方仍然帶埋傷兵一齊去卡塔爾，一旦奪冠，人人有獎牌，可以一齊捧盃，證明球隊夠晒團結。

另外，皇馬中場卡馬雲加已經傷愈，可以出戰周日(15日)凌晨西甲作客華歷簡奴。