曼城「狗急跳牆」　竟然想簽普巴

曼城今季成績大倒退，好大程度上因為主將洛迪卡斯簡迪長期養傷，中場失去1位負責串聯工作嘅關鍵人物，盛傳「藍月亮」將於下月轉會市場重開後增兵，繼睇中般奴古馬雷斯、蘇比文迪之後，依家再傳出有興趣簽入前曼聯中場保羅普巴。

根據英國《獨立報》爆料，曼城難以喺季中搶走紐卡素中場般奴古馬雷斯、皇家蘇斯達中場蘇比文迪，因而考慮向自由身球員保羅普巴埋手，並開始了解佢嘅近期狀況。

事實上，領隊哥迪奧拿曾經表示自己係普巴嘅球迷，非常欣賞呢位31歲法國國腳。普巴早前同祖雲達斯解約後，可以隨時加盟其他球隊，哥帥希望趁機簽入佢。普巴日前喺社交網上載3個emoji圖案，似乎暗示有新着落，令人聯想可能同曼城傾掂數。

保羅普巴效力曼聯期間，上陣233場入39球及48次助攻，輿論認為只要佢專心踢波，絕對1位高質素球員，有能力幫到曼城。不過，普巴服食禁藥一案嘅停賽令，要等到明年3月先至屆滿，即使曼城簽入佢，恐怕遠水救唔到近火。