東網電視
更多新聞短片
迪利阿里入場睇科木贏羅馬。
前英格蘭國腳迪利阿里闊別球場差唔多2年，周一(16日)凌晨喺意甲球會科木主場現身，科木教練法比加斯證實迪利阿里有機會以自由身加盟，聖誕節後會正式跟操提升狀態，重返球場指日可待。
科木主場對羅馬一戰，球迷睇到好興奮，科木喺補時階段連入2球，戲劇性2比0贏波，而觀眾席上就有英格蘭球星迪利阿里，呢位28歲中場對上一次落場踢波，已經係上年2月為比錫達斯上陣，上季「掛名」係愛華頓球員，但一場波都冇踢過，夏天回復自由身。
法比加斯賽後透露：「關於迪利阿里嘅事我唔想講太多，或者佢有機會喺聖誕節之後正式跟球隊練習，我想幫佢重拾狀態，其他事情暫時唔諗咁多。」
