梅迪歷離奇消失　傳藥檢失敗面臨長期停賽

車路士近期狀態大勇，喺各項賽事取得7連勝，不過烏克蘭翼鋒梅迪歷自月初對維拉有份做後備(未落場)，近4場比賽都冇進入大軍名單，甚至連操練都見佢唔到。據烏克蘭傳媒爆料，梅迪歷喺10月底一次藥檢「肥佬」，依家正等候第2次藥檢結果，如果發現曾服用禁藥會面臨長期停賽。

烏克蘭著名記者Ihor Tsyhanyk日前暗示：「老實講，記者經常有內幕消息，但最好等官方公布。呢一刻，我相信下星期(今周)所有人都會談論梅迪歷。」據網站《Tribuna》爆料，梅迪歷喺10月底藥檢驗出有禁藥成份，而B樣本將會喺短期內作出化驗。

現年23歲嘅梅迪歷，上年1月由薩克達加盟車路士，轉會費連獎金條款高達1億歐元，不過佢加盟後表現令人失望，上季只有5個聯賽入球，今季英超7次上陣亦未開齋。車路士上場贏賓福特賽前，領隊馬利斯卡交代傷停名單，只係簡單話「梅迪歷未能候命」，未有交代詳細原因。