東網電視
更多新聞短片
艾迪侯域獲「指示」重用東拿利。(Getty Images)
紐卡素周四(19日)凌晨喺英聯盃8強，主場3比1擊敗賓福特晉級4強。呢場波背後有段感人故事，話說一位紐卡素球迷身患絕症，賽前獲領隊艾迪侯域邀請見面，該球迷趁機「指引」艾迪侯域要用辛度東拿利擔正，果然呢位意大利球星梅開二度，成為紐卡素晉級最大功臣。
紐卡素球迷亨特早前驗出患有末期癌症，佢喺記者協助下，爭取到過身前同艾迪侯域見面機會，喺對賓福特賽前記者會結束後，兩人就見面擁抱，亨特第1時間話：「要用東拿利打正選......好不幸我時間無多，不過今場都會入場打氣。」艾迪侯域亦回應「我會考慮你嘅意見。」
紐卡素今場果然有東拿利擔正，呢位意大利國腳喺上半場就入2球，換邊後紐卡素再有法比安舒哈入波，而賓福特只喺完場前有韋沙破蛋。紐卡素對上一次捧盃係1955年嘅英足盃，仲差兩步就可以打破近70年嘅錦標荒，相信冠軍會係送畀亨特嘅最佳禮物。
