法甲恐怖襲擊！當拿隆馬慘被「毀容」

周四(19日)凌晨法甲出現駭人襲擊畫面，摩納哥主場迎戰巴黎聖日耳門(PSG)嘅聯賽大戰，PSG門將基安盧基當拿隆馬喺比賽早段，被韋費特辛高鞋底踩中面部，即場血流如注並退下火線，當拿隆馬賽後亦公開恐怖傷勢，最離奇係「兇手」辛高竟然連黃牌都冇張！

呢場法國前列大戰，22分鐘辛高右路突破射門被當拿隆馬落地封出，不過當呢位翼鋒打算跳過對方，鞋底就直接踩向當拿隆馬右邊面。當拿隆馬即時血流披面，連右眼都睜唔開，要提早離場治療。辛高喺比賽早段已經拎黃牌，但今次魯莽踢傷對手，最後竟然連黃牌都冇，就爭嚟唔少爭議。

PSG今場喺先開紀錄後，一度被摩納哥反超前2比1，不過下半場由奧士文尼迪比利梅開二度，加上干卡路拉莫斯建功，最終贏4比2全取3分。PSG教練安歷基賽後表示：「我唔評論球證判決，我知道辛高唔係故意踢傷人，球證好難做，我只係慶幸完成贏波目標。」