「不敗男」施洛挑戰利物浦一項神級紀錄

利物浦今季由施洛執教後銳不可當，上場英聯盃擊敗修咸頓，各項賽事連續20場不敗，如果下周一(23日)凌晨英超主場作客熱刺，能夠取得分數而回，就可以打破英超成立以來，利物浦最長不敗紀錄。

利物浦對上一次各項賽事連續20場不敗，已經係1996年3月，但去到第21場輸波。紅軍現時又有機會寫下新里程碑，只要今場唔輸畀熱刺，就可以創下球隊自1989年以來最長不敗紀錄，當年英超仲未成立。

賽前施洛向對手送高帽，話自己早年已經好鍾意睇熱刺比賽，欣賞加斯居尼、真路拿、加里夫巴利、莫迪歷等名將，仲大讚現時熱刺主帥普斯迪高路領軍踢出悅目足球，值得贏1次冠軍。利物浦將於今屆英聯盃4強對熱刺，莫非施洛想將錦標拱手讓人？

另外，利物浦上場英聯盃贏修咸頓，領隊施洛追平135年前普雷斯頓主帥威廉蘇度爾嘅紀錄，以24戰20勝3和1負，成為史上首季執教英格蘭頂級聯賽球隊，最快獲得20場勝仗嘅領隊之一。