東網電視
更多新聞短片
森保安古沙(右)今場頂入1球。(Getty Images)
1/2
周日(22日)凌晨意甲，拿玻里作客以2比1擊敗熱拿亞，並趁阿特蘭大遲1日比賽，暫時升上榜首。法國名宿韋拉接手執教熱拿亞之後，踢到第5場首嘗輸波滋味。
熱拿亞上月初炒咗教練基拿甸奴，並聘請韋拉領軍，佢帶隊首4戰取得1勝3和，包括同AC米蘭踢成0比0，但今仗遇上拿玻里，防線招架唔住對手強攻。開賽4分鐘，拿玻里前鋒盧卡古頭槌攻門中楣彈出，其後攻勢一浪接一派，分別由中場森保安古沙、中堅拉亞馬尼頭槌頂入，上半場23分鐘已經領先2球。
換邊後初段，熱拿亞由前鋒賓拿蒙迪入波追番1球，並壓住對手來攻，但多次攻門都被演出神勇嘅拿玻里門將阿歷斯美列特化解，令韋拉嘅意甲教波生涯首嘗敗績。
賽後韋拉話：「我哋下半場創造大量攻勢，應該值得扳平，雖然最後輸波，但只要保持今仗下半場水準，未來成績一定會愈來愈好。」意甲中下游球隊積分接近，熱拿亞仍然未擺脫降班威脅。
拿玻里教練干地(左)同熱拿亞教練韋拉合照。(Getty Images)
