英足總冇開工？狼隊神鋒獲「放生」鬥曼聯

曼聯周五(27日)凌晨英超作客狼隊，將會面臨重大考驗。狼隊喺新帥域陀佩利拉接手後第1場即大勝，預期將面臨停賽重罰嘅巴西前鋒馬菲奧斯根夏，目前仍未收到任何判刑，消息指佢好大機會可以上陣砌「紅魔鬼」。

根夏係狼隊嘅靈魂人物，今季已有9個聯賽入波，佢之前喺對葉士域治一仗捲入打鬥事件，將對方一名教練打到眼鏡都甩埋，上周被足總檢控行為不檢，預料會被罰停賽多場。不過事隔超過1個星期，英足總突然冇晒聲氣，根夏喺上場對李斯特城照樣上陣兼入波，據報今場對曼聯亦會繼續披甲。

曼聯官網賽前軍情報告指出「受到足總檢控嘅根夏，上場聯賽仍然上陣兼入波，今場能否出賽暫時唔清楚。」有網民估計英格蘭足總員工放緊聖誕假，所以處理唔到對根夏嘅檢控，預料要等到足總「復工」先會有結果。