曼聯逼馬古尼減薪　拿玻里趁機挖角

曼聯中堅哈利馬古尼將於今夏約滿，雖然紅魔鬼管理層有意同呢位31歲英格蘭國腳續約，但希望佢減薪，配合新股東拉特克利夫「節流政策」，可能令續約談判失敗，盛傳意甲勁旅拿玻里趁機斟介馬古尼，簽入佢同前曼聯中場麥湯米尼拍住上。

哈利馬古尼今夏約滿後，曼聯有權優先同佢續約1年，但如果使用自動續約條款，意味需要維持19萬鎊(約185萬港元)周薪，管理層認為呢個數目太高，希望同馬古尼傾新合約，說服佢減人工。不過，哈利馬古尼今季表現出色，自然唔想讓步，導致續約遇阻滯，隨即引起其他球會注意。

當中以拿玻里對馬古尼最有興趣，因為教練干地對於「紅魔兵」情有獨鍾，當年執教國際米蘭，向曼聯收購射手盧卡古，令佢事業重生，今季簽入麥湯米尼，效果亦非常好，想順勢簽入馬古尼，提升防線實力。

此外，土耳其球隊費倫巴治亦睇中馬古尼，因為教練摩連奴非常欣賞佢，擔任球賽評述期間，多次稱讚呢位中堅，希望有機會同佢合作。