東網電視
更多新聞短片
卡維特利雲打破16場入球荒。(Getty Images)
今季成績差勁嘅熱刺，再次成為英超「黃大仙」，周日(19日)作客愛華頓輸2比3，對上10場聯賽只得1勝，依家排喺第15位，領隊普斯迪高路賽後拒談「炒魷」話題，表明有信心可帶領球隊重返正軌。
熱刺今季被諷刺係「黃大仙」，任何頹勢球隊對住佢哋都可以反彈，水晶宮開季3和5負，對住熱刺就成功「開齋」；葉士域治開季5和5負，又係對熱刺拎到升班第1場勝仗；愛華頓就成為最新得益者。
愛華頓上半場憑卡維特利雲、伊利文尼戴耶同艾查格雷擺烏龍領先3比0，熱刺下半場由古路施夫斯基同李察利臣追番兩球，最終仍輸2比3。愛華頓新帥莫耶斯，拎到回巢執教後首場勝仗。
愛華頓之前11場聯賽有9場「交白卷」，今場一口氣喺熱刺身上入3球，射手卡維特利雲打破16場入球荒，呢位英格蘭前鋒表示：「好開心終結呢段低潮，今場一切都好順利，我哋要以今場為基礎繼續進步。」
