東網電視
更多新聞短片
麥巴比近期士哥頻頻。(Getty Images)
皇家馬德里周日(19日)西甲大發神威，主場以4比1大勝拉斯彭馬斯，趁住馬德里體育會同巴塞隆拿喺早1日失分，順利登上榜首位置。法國前鋒基利安麥巴比今場梅開二度，球會生涯入波突破300球里程碑。
皇馬今場開波唔夠1分鐘，就被法比奧施華攻陷，不過皇馬實力強橫，三扒兩撥就由麥巴比(2球)同巴謙戴亞斯入波，半場反勝3比1。洛迪高高斯57分鐘又入1球，拉斯彭馬斯之後仲有辛度拉美利斯紅牌被逐，不過皇馬亦收夠籌，最終贏4比1完場。
麥巴比近期腳風極順，今場梅開二度後，佢喺球會生涯累積301球，成為美斯之後，史上第2年輕達到300球里程碑球員(26歲30日)。完場後巴拿貝球迷都高呼麥巴比個名，呢位法國球星表示：「呢一幕係我嘅夢想，我好開心，因為我已經適應球隊，踢出我嘅水平。」
