東網電視
更多新聞短片
艾杜萊巴亞(左)被曼城外借去朗斯，麥法蘭(5號)由紐約城加盟曼城。
曼城趁今個月冬季轉會市場大肆增兵，繼收購前鋒馬莫殊、中堅卡胡辛洛夫、域陀雷斯之後，再打孖嚟，簽入2位18歲新星，包括華拉度列中堅艾杜萊巴亞、紐約城左後衞麥法蘭，其中艾杜萊巴亞立即被外借去法甲球隊朗斯，作為未來人才投資。
艾杜萊巴亞身高1米95，制空力強，並已晉身塞拉利昂大國腳，佢上年加盟華拉度列後，主要踢B隊賽事，今季西甲僅2次上陣。曼城簽入呢位中堅，立即將佢外借去朗斯，相信係由於「藍月亮」早前收購朗斯中堅卡胡辛洛夫，今次作出回報，同時可以利用朗斯幫手培訓艾杜萊巴亞，畢竟以巴亞資歷，即使現時加入曼城大軍，亦難有上陣機會。
至於麥法蘭本身喺英國出世，3歲時同家人移居美國，4年前加入紐約城青年軍，佢屬於英格蘭U18小國腳，潛力優厚，曼城及紐約城屬於同一集團，今次簽入麥法蘭並冇難度。
