東網電視
更多新聞短片
![](/hk/bkn/cnt/sport/20250128/photo/bkn-20250128110330319-0128_00882_001_01p.jpg?20250128094729)
古橋亨梧(中)同雷恩簽約2年半。
法甲球隊雷恩正式宣布,簽入些路迪前鋒古橋亨梧,雙方簽約2年半,轉會費為1,000萬歐元(約8,140萬港元),呢位射手成為法甲史上第17位日本球員。雷恩現時排聯賽尾三,深受降班威脅,古橋亨梧肩負拯救球隊重任。
現年30歲嘅古橋亨梧4年前由神戶勝利船轉投些路迪,為呢支蘇超勁旅上陣165場入85球,協助球隊奪得8項錦標,包括3次蘇超冠軍。古橋亨梧今季32次披甲有12球進帳,表現仍然出色,但有傳日本國家隊主帥森保一認為蘇超水平比較低,建議古橋亨梧去歐洲5大聯賽搵食,接受新挑戰,以確保國家隊位置,所以佢向些路迪提出轉會,雷恩急需要增兵打護級戰,雙方一拍即合。
古橋亨梧轉戰法甲,將會遇上唔少同胞,包括摩納哥中場南野拓實,蘭斯孖寶伊東純也、中村敬斗等。雷恩近4場聯賽全敗,將於下周一(2月3日)凌晨主場對斯特拉斯堡,古橋亨梧屆時有望披甲。