東網電視
更多新聞短片
勞基梳爾剛復出又受傷。(Getty Images)
曼聯「玻璃人」勞基梳爾受傷無限Loop！上星期先至復操嘅勞基梳爾，據報喺訓練期間再度觸傷舊患，將會再養傷大約1個月時間，令曼聯後防再次出現危機。
英國《獨立報》報道，勞基梳爾近日復操後，肌肉傷勢出現反覆，視乎治療反應，預計要再抖多4個星期，喺利辛度盧比斯提早收咧、杜維爾馬拉西亞被外借後，曼聯後防人手真係掹掹緊。
勞基梳爾近年傷患不斷，上季最後3個月因大腿傷患提早收咧，夏天歐國盃趕及復出，點知搞到小腿受傷缺席開季。自魯賓艾摩廉上任後，佢只係3次後備上陣又再受傷，一直到依家都未好番。
勞基梳爾上季只踢12場聯賽，今季更只參與過2場英超，隨時打破佢15/16球季因斷腳只踢5場嘅「最低上陣紀錄」。
