東網電視
更多新聞短片
華布根被譽為「新雲達沙」。
白禮頓喺周六(15日)凌晨英超主場大勝車路士3比0，打開紀錄1球，門將華布根有好大功勞，佢大腳長傳畀三笘薰射入，成為今季英超第5位貢獻助攻嘅守門員，同時令英超創下自2010/11年球季之後，最多門將取得助攻嘅一季。
在此之前，曼城門將艾達臣摩拉斯、賓福特門將菲利根、愛華頓門將比克福特、富咸門將賓特尼奴今季聯賽都曾經妙傳隊友入波，華布根今場亦成為「助攻門將」一員。
呢位22歲荷蘭新星身高1米93，2023年夏天由安德列治加盟白禮頓，並有份為荷蘭出戰上年歐國盃決賽周，年紀輕輕已奠定球會及國家隊主力地位，被譽為「新雲達沙」，佢今場長傳助攻，的確有呢位前輩影子。
值得一提，華布根上場英足盃第4圈對車路士，不幸擺烏龍，今仗以1次精彩助攻，成功挽回面子。
