東網電視
更多新聞短片
奧比馬田在日前U18英足盃對車路士射入3球。(Getty Images)
曼聯將於周一(17日)凌晨英超作客熱刺，領隊魯賓艾摩廉透露有3位新增傷兵，並暗示可能提拔青年軍球員上一隊，以解燃眉之急。英國傳媒推測，日前喺U18英足盃對車路士，大演「帽子戲法」嘅17歲前鋒奧比馬田有望入選今場大軍名單。
魯賓艾摩廉接受訪問時話：「原本備戰工作唔錯，直至近兩日出現新問題，舊有傷兵未回歸之餘，反而多咗2位新傷兵，仲有1位生病，下場聯賽陣容要再審視，近日搵幾位年輕球員一齊操練，奧比馬田係其中之一，教練團會對佢哋作出評估，至於邊位會加入大軍名單，現時唔可以講。」
英國傳媒估計，奧比馬田最大機會獲提升上一隊，呢位丹麥小國腳上年夏天由阿仙奴轉投曼聯，為紅魔鬼青年軍上陣12場入12球及2次助攻，實力大超班，的確有能力「升呢」成為一隊球員。
