東網電視
更多新聞短片
巴塞隆拿近年陷入財困，急需要搵銀。(Getty Images)
巴塞隆拿近年陷入財困，甚至因為財政唔符合西甲賽會要求，導致一度無法為丹尼爾奧莫等球員註冊，會方急需要搵銀，根據西班牙《世界體育報》爆料，巴塞隆拿將於7月前往南韓踢2場季前熱身賽，預料可以獲得1,000萬歐元(約8,200萬港元)收入。
據悉巴塞隆拿開始為今夏季前熱身賽兼「吸金」之旅，展開規劃工作，南韓屬於其中一站，第1場會同有前曼聯中場連格助陣嘅FC首爾交鋒，至於第2場對手仍未確定，可能鬥全北汽車，或者韓職明星隊。巴塞隆拿方面唔介意對手係邊隊，最重要係有豐厚戲金，踢2場就可以袋1,000萬歐元，的確非常好搵。
巴塞隆拿除咗靠亞洲之旅搵銀之外，亦準備今夏出售部分球員套現，盛傳最大機會賣走後衞朗奴阿拿奧祖，拜仁慕尼黑、祖雲達斯都有興趣簽入呢位即將26歲嘅烏拉圭國腳，估計佢身價達5,000萬歐元(約4.1億港元)，如果可以用呢個價錢成交，將能夠大大舒緩巴塞財政壓力。
