東網電視
更多新聞短片
曼聯後備席有8個青年軍球員。(Getty Images)
曼聯近日爆出大量傷兵，利辛度馬天尼斯同阿密特迪亞路先後提早收咧，明奈、曼紐爾烏加迪同杜比高利亞亦因傷倦勤，作客熱刺一仗後備席9個球員，有8個係唔夠20歲嘅青年軍，結果魯賓艾摩廉選擇喺91分鐘先做全場唯一換人，被炮轟係管理失當。
曼聯後備只有域陀連迪路夫係一隊球員，不過青訓都有唔少令人興奮嘅名字，「怪物級」新人前鋒奧比馬田就備受期待。曼聯雖然長時間落後，但魯賓艾摩廉一直按兵不動，去到補時1分鐘先用奧比馬田入替卡斯米路，全無表現機會下完成「處子戰」，效用係零。
大批曼迷對換人表示不滿：「垃圾時間換入奧比馬田係種侮辱」、「得3分鐘，你期望奧比馬田做到乜」。魯賓艾摩廉賽後解釋：「英超係世界上最難應付嘅比賽，我嘗試好小心咁照顧佢哋(小將)。我覺得球隊當時努力爭取入波，所以唔想改變，小將會有機會，佢哋要做好準備，我只係唔覺得需要換人。」
