東網電視
更多新聞短片
祖迪比寧咸(5號)將缺陣末來2場西甲。(Getty Images)
皇馬中場祖迪比寧咸上輪西甲對奧沙辛拿，疑似爆粗辱罵球證梅紐拉，被出示紅牌趕出場，賽後「銀河艦隊」提出上訴，但現已被西甲紀律委員會駁回，判呢位英格蘭國腳停賽2場。至於球證梅紐拉早前被指涉及利益衝突，現時打甩指控。
球證梅紐拉喺報告中指祖迪比寧咸向佢爆粗講：「Fxxk You」，皇馬教練安察洛堤指呢位愛將當時講：「Fxxk Off」只係發洩自己，球證因唔識英文而理解錯誤，皇馬會方亦提出上訴，要求取消紅牌。
西甲紀律委員會經過聆訊後，發表聲明指皇馬並冇提供足夠證據以判斷比寧咸說話內容，裁定比寧咸不尊重球證，但只判最輕處罰，停賽2場，意味佢將缺陣末來2場西甲主場對基羅納及作客貝迪斯。
另外，球證梅紐拉被指同顧問公司Talentus Sports有聯繫，呢間公司同馬體會有商業關係，涉及利益衝突，因此被禁止執法周中歐洲賽，西班牙足協現時還佢清白，確定梅紐拉並冇犯錯。
