東網電視
更多新聞短片
史東斯(右)可能缺陣2至3個月。(Getty Images)
曼城上場歐聯附加賽次回合不敵皇馬，被淘汰出局之餘，仲有中堅史東斯受傷，領隊哥迪奧拿表示，呢位30歲英格蘭國腳將缺陣一段長時間，有傳起碼抖2至3個月，意味好大機會緣盡今季餘下賽事。
史東斯上仗踢咗8分鐘就受傷退下火線，哥迪奧拿最新透露，呢位中堅傷勢有麻煩：「史東斯將會休息一段長時間，我哋會盡快決定佢是否需要接受手術。」有曼城隨隊記者爆料，指史東斯可能缺陣2至3個月，佢今季已經第3次受傷，名副其實係「玻璃腳」。
曼城防線球員今季輪流受傷，另1位後衞文路爾艾簡治亦因傷，好可能提早收咧，尼敦阿基剛傷愈不久，史東斯今次長抖，令「藍月亮」雪上加霜。
