東網電視
更多新聞短片
拉明耶馬(左)被對手踢到流血。(Getty Images)
周日(23日)凌晨西甲，巴塞隆拿作客以2比0擊敗拉斯彭馬斯，取得聯賽5連勝排榜首，但係貢獻助攻嘅拉明耶馬受傷，賽後佢將「血腳」放上社交網，暗寸球證有眼無珠，冇吹罰對手。
巴塞隆拿今場表現麻麻，上半場入唔到波，換邊後教練費歷克作出調動，先至開始有起色。踢到62分鐘，拉明耶馬斜傳，由後備上陣嘅丹尼爾奧莫射入打開紀錄，去到補時，另1位後備入替嘅球員費倫托利斯射成2比0完場。
賽後巴塞主帥費歷克承認球員出現疲態：「我認為每位球員都缺少5%至10%狀態，導致唔夠控球權，踢出唔理想足球，所以陷入苦戰。」拉明耶馬踢到85分鐘被換離場，佢喺更衣室拍攝受傷流血嘅左腳放上社交網，並寫住：「冇犯規？」似乎不滿遭對手踢傷，但球證卻視若無睹，幸好呢位新星只係皮外傷，應該冇大礙。
另1場西甲，馬德里體育會憑祖利安艾華利斯梅開二度，加上安祖哥利亞入波，作客以3比0擊敗華倫西亞，落後巴塞隆拿1分，雙方將於周三(26日)凌晨西班牙盃4強首回合交鋒，勢必有激鬥。
