東網電視
更多新聞短片
利物浦5年前曾獲阿仙奴列隊歡迎。
英超經過上星期賽事後，冠軍爭逐基本上已有定案，喺榜首帶出11分嘅利物浦，重奪聯賽冠軍係時間問題，其中一大可能性，係喺5月10號主場對阿仙奴前加冕，「兵工廠」球員可能要面臨列隊歡迎利物浦嘅情況，重演5年前一幕。
利物浦擊敗曼城後帶出11分，就算阿仙奴贏晒最後12輪，頂多只係得89分，而利物浦贏晒最後11場可以有97分，代表「紅軍」有機會喺5月10日嘅尾3輪賽事，主場對阿仙奴一戰提早封王，如果利物浦更早奪冠，阿仙奴就要喺賽前列隊，恭迎冠軍利物浦入場。利物浦上次喺2020年贏英超冠軍，阿仙奴亦有列隊迎接高普帶領嘅「紅軍」進場。
英國《天空體育》主持、前阿仙奴球星麥臣表示：「利物浦依家要訂巴士準備巡遊，依家提早訂會平好多，如果你等到5月先去訂，巴士公司知道你有需要，肯定會開天殺價！」利物浦周一(25日)凌晨作客贏曼城後，球迷已經喺作客球迷區高唱「我哋贏冠軍」歌曲。
