東網電視
更多新聞短片
田中碧頂入反勝一球。(Getty Images)
周二(25日)凌晨英冠榜首大戰，「1哥」列斯聯喺早段先落後情況下，最後18分鐘狂轟3球，作客以3比1反勝錫菲聯，喺榜首領先優勢拉開到5分，下季大有機會重返英超，而日本國腳田中碧再次成為英雄。
錫菲聯今場13分鐘攻門頂中楣底，列斯聯門將梅斯利亞滾水淥下將個波撞入自己龍門。列斯聯失守後奮力反攻，72分鐘由祖尼亞費普追平，完場前1分鐘田中碧喺角球攻勢頭槌頂入，助列斯聯反敗為勝；洩條嘅錫菲聯1分鐘後再被派路爾入多粒，列斯聯最終贏3比1。
田中碧近期入球大爆發，今場攻入關鍵反勝球，係佢踏入2025年後第3個入波，上月初對侯城入世界波，就當選列斯聯「1月金球」。列斯聯上年用295萬鎊由杜塞爾多夫簽入田中碧，呢位26歲中場表現受到唔少大球會賞識，據報列斯聯為佢標價2,000萬鎊，今場之後身價肯定繼續上升。
