東網電視
更多新聞短片
哈利卡尼(左)腳風不順。(Getty Images)
周六(1日)凌晨德甲，榜首拜仁慕尼黑作客以3比1反勝史特加，拋離踢少1場嘅第2位利華古遜11分，向冠軍邁進一大步。不過，拜仁首席射手哈利卡尼已經連續4場比賽冇波入，加上佢曾於早前歐聯對些路迪一役受傷，令人懷疑傷患未斷尾，導致影響發揮，成為拜仁爭標隱憂。
拜仁慕尼黑原本可以先開紀錄，但穆斯亞拿單刀射斜出界，史特加避過一劫果然有後福，由安祖路史迪拿勁射入網領先，臨完上半場，拜仁憑米高奧利斯入波扳平。換邊之後，史特加防線連接犯錯「送禮」，拜仁再由哥列斯卡、京士利高文各建功一功，近10場聯賽取得9勝1和。
不過，以21球排射手榜第1位嘅哈利卡尼陷入入球荒，自上月歐聯附加賽首回合對些路迪入波後，近4次上陣都食白果，佢喺次回合受傷後，雖然近2場聯賽都有披甲，但表現令人失望，今仗冇波入之餘，更加食黃牌，似乎心急想入波，反而愈踢愈躁。
