東網電視
更多新聞短片
干卡路拉莫斯(左)及基華拉斯基利亞(右)近年都曾於歐聯射入利物浦大門。
巴黎聖日耳門(PSG)將於周四(6日)凌晨歐聯16強首回合主場對利物浦，呢支法甲勁旅除咗翼鋒奧士文尼迪比利大勇之外，仲有2位「紅軍殺手」基華拉斯基利亞、干卡路拉莫斯，2人近年都曾於歐聯射入利物浦大門，今仗隨時做主角。
基華拉斯基利亞今年1月以7,000萬歐元(約5.7億港元)轉會費由拿玻里加盟PSG後，各項賽事上陣10場射入2球及4次助攻，成為球隊新進攻發動機。
呢位24歲格魯吉亞國腳效力拿玻里期間，累積唔少歐聯比賽經驗，代表作一定係2022年9月首次踢呢項大賽對利物浦，射入1球及1次助攻，協助拿玻里大勝4比1，打出名堂，基華拉斯基利亞今次再遇「紅軍」，未踢已先贏信心。
至於干卡路拉莫斯效力賓菲加期間，曾於2022年歐聯8強次回合對利物浦，射入1球。值得一提，佢當年隊友達雲紐尼斯兩回合對紅軍，都有波入，其後被利物浦收購。呢2位昔日拍檔分道揚鑣後，事業發展麻麻，今次正面交手，就睇下邊位可以率先翻身。
