東網電視
更多新聞短片
尼格度結束20年職業球員生涯。(Getty Images)
現年39歲嘅前曼城射手尼格度正式宣布，結束20年職業球員生涯，呢位西班牙名將曾於2013年跟隨曼城訪港比賽，當時喺滿佈泥濘嘅香港大球場跌倒「食泥」，成為球迷集體回憶，甚至入選英媒2013年20大年度體壇圖片。
尼格度出身於華歷簡奴青訓系統，年少得志獲皇馬簽入，但不獲重用，轉投西維爾後打出名堂，上陣182場入85球，2013年被曼城收購，並隨隊訪港出戰「英超挑戰盃」。尼格度喺大球場「食泥」嘅慘況「一戰成名」，未知佢是否心靈受打擊，僅效力曼城1季就離隊，轉投華倫西亞。
尼格度其後踢過米杜士堡、比錫達斯、卡迪斯，甚至去過阿聯酋搵食，佢上季效力當時西乙球隊華拉度列，上陣12場僅入1球。華拉度列取得升班資格後，尼格度不獲留用，一直未有球會收留，現時最終宣布退休。
