東網電視
更多新聞短片
曼聯頻頻喺強隊身上搶到分。(Getty Images)
曼聯今季表現差勁，只能喺聯賽下游掙扎，不過每次對住頂級球隊都有好表現，下半季先後作客2比1贏曼城、作客2比2和利物浦，以及啱啱主場1比1和阿仙奴。曼聯領隊魯賓艾摩廉承認喺呢啲大戰入面，「泊大巴」令佢哋更易拎到成績，但強調曼聯唔會紓尊降貴，拒絕長期採用呢種戰術。
對於曼聯頻頻喺強隊身上搶到分，艾摩廉表示：「當然，當你執教嘅係曼聯，唔可能成日踢呢種戰術(低位防守)。贏波係最終目標，你想像到呢種踢法係有助喺大戰入面爭勝，我知球迷睇到會覺得好沮喪，但有時都要採用一啲唔受歡迎嘅戰術。未來我哋唔會咁踢，今次只係為爭取勝利，我相信球迷會明白。」
事實上，曼聯自費格遜退休之後，已經逐漸轉型做穩守突擊踢法，近年改玩傳控同逼搶反而「兩頭唔到岸」，唔少球迷亦開始懷念摩連奴時代嘅功利足球，好過依家淪為護級球隊。
