東網電視
更多新聞短片
馬古斯杜林在歐聯16強首次回合都有波入。(Getty Images)
周三(12日)凌晨歐聯16強次回合，國際米蘭主場以2比1擊敗飛燕諾，兩回合合計贏4比1，成為8強之中唯一意甲球隊。今場係施蒙尼恩沙基執教國際米蘭第200場比賽，正好用贏波慶祝創下新里程碑。
國際米蘭首回合贏2比0，今場仍然採取主動，開賽未夠8分鐘就入波，馬古斯杜林左路突破之後，扣入大位勁射破網，呢位法國國腳繼首回合後，再次為國米入波打開紀錄。國米攻勢一浪接一浪，包括泰尼米勁射，但被門將韋倫雷特撲出。
踢到上半場尾段，國米中場查漢奴古喺禁區內犯規，球證睇完VAR後判罰12碼，飛燕諾由積及莫達主射入網扳平。
換邊之後，輪到飛燕諾被判罰12碼，查漢奴古將功補過，主射入網協助國際米蘭贏2比1，今場勝仗對於國米主帥施蒙尼恩沙基有特別意義，佢成為球隊史上第5位執教達200場嘅主帥，國際米蘭將於8強對拜仁慕尼黑。
