東網電視
更多新聞短片
達雲紐尼斯(左)今場表現一無是處。(Getty Images)
利物浦以歐聯「聯賽階段」一哥身份出線，卻16強止步，主帥施洛上場次回合換入「敗家仔」達雲紐尼斯，被指係自斷一臂。包括加時在內，呢位烏拉圭前鋒踢咗47分鐘，卻0射門，更加喺互射12碼階段宴客，成為出局罪人。
達雲紐尼斯73分鐘入替迪亞高祖達之後，表現一無是處，只有14次觸球，4次地面爭搶只有1次成功，4次爭項有2次勝出，並有5次失去控球權，佢上陣之後，利物浦鋒線力量不升反降。達雲紐尼斯早前表示，經常同烏拉圭同胞兼前利物浦射手蘇亞雷斯交流比賽心得，網民寸佢完全冇喺「哨牙蘇」身上學到任何射門技巧。
早前傳出沙特豪門艾納斯原本有意收購達雲紐尼斯，但被利物浦拒絕，經此一役之後，紅軍高層現時有冇後悔呢？
不過，利物浦今場歐聯攻門質素非常低，18次射門都唔中目標，施洛真係要諗下計改善問題，否則下周一(17日)凌晨英聯盃決賽對紐卡素，隨時又失冠。
