東網電視
更多新聞短片
里奧費迪南(左)認為約基利斯(右)無法適應英超高強度比賽節奏。(Getty Images)
曼聯鋒線球員腳頭無靈，盛傳領隊魯賓艾摩廉有意今夏收購士砵亭舊部屬約基利斯，提升攻力，但紅魔鬼名宿里奧費迪南唱反調，指呢位26歲瑞典國腳嘅身體質素無法適應英超嘅高強度比賽節奏。
約基利斯今季為士砵亭上陣40場入39球，獲得曼聯、阿仙奴等大球會垂青，里奧費迪南表示，曾經觀察呢位射手表現，並發現佢嘅弱點：「我有3次非常近距離睇約基利斯比賽，佢嘅身體質素應該適應唔到英超強度，我睇唔出佢有乜特別之處，一旦登陸英超，能否保持現時入球數字，實在令人懷疑，現代足球對身體質素要求非常高，艾摩廉需要強壯及擅於跑動嘅球員。」
約基利斯早於2017年已加盟過英超球隊白禮頓，但大部分時間被外借去英冠球隊史雲斯同高雲地利，其後轉投士砵亭先至打出名堂，難怪里奧費迪南認為約基利斯重返英國球壇都係無運行。
