東網電視
更多新聞短片
史達寧今場交出2次助攻。(Getty Images)
周四(13日)凌晨歐聯16強次回合，阿仙奴喺主場對燕豪芬嘅「例行公事」排出怪陣，6個左閘都先後上陣，最後由史達寧交出2次助攻，同燕豪芬踢成2比2平手，兩回合合計大勝9比3，連續兩年躋身歐聯8強。
殘陣嘅阿仙奴喺首回合狂勝，今場留力下排出怪陣，左閘基蘭泰亞尼以正選左翼上陣，另一左閘辛真高就重操故業踢進攻中場，中堅積及基奧柯今季亦踢過左閘，連埋後備上陣嘅卡拉費奧利同祖利安添巴，加上正選左閘利維斯史基利，今季踢過左閘嘅6個球員都落場，何其壯觀。
阿仙奴開波6分鐘就由辛真高遠射先開紀錄，燕豪芬18分鐘憑比列錫妙射追平，37分鐘史達寧右路底線傳中，迪格蘭賴斯接應頂成2比1，但70分鐘被迪里奧治單刀攻陷，次回合踢成2比2完場。史達寧今場交出2次助攻當選最佳球員，但佢因為拎到黃牌，要喺8強首回合停賽。
