東網電視
更多新聞短片
基爾獲加代迪利阿里求情。
英格蘭球星迪利阿里周日(16日)凌晨喺意甲首演，闊別2年後再次喺球場露面，不過呢個紀念性時刻變成惡夢。迪利阿里為科木上陣10分鐘，就因粗野攔截被紅牌驅逐，連對手基爾獲加都向球證求情，希望放迪利阿里一條生路，科木最終1比2不敵AC米蘭。
科木今場33分鐘先開紀錄，但主場嘅AC米蘭下半場大反擊，基斯甸普列錫同雷恩達斯入波反超前2比1。科木喺81分鐘換入1月加盟嘅迪利阿里，亦係佢自2023年2月後，時隔2年再喺正式賽事上陣，點知佢喺91分鐘粗野踢跌對手，球證最初判罰黃牌，但VAR介入後決定提升為紅牌。AC米蘭右閘基爾獲加同迪利阿里曾經喺熱刺做隊友，佢亦向球證作出求情，但判決最終並冇改變。
科木教練法比加斯賽後批評迪利阿里：「呢個係一個嚴重錯誤，以佢咁有經驗係絕對唔應該犯，呢張紅牌非常明顯，冇嘢可以解釋，當球隊喺最後全力爭取2比2嗰陣，係迪利阿里令到我哋只能以10人應戰。」
