東網電視
更多新聞短片
杜格拉斯雷斯(左)為祖雲達斯上陣22場0入球，亦0助攻。(Getty Images)
祖雲達斯上年夏天豪花5,000萬歐元(約4.2億港元)收購阿士東維拉中場杜格拉斯雷斯，但呢位26歲巴西國腳大跌Watt，上陣22場0入球，亦0助攻，根據《米蘭體育報》爆料，祖記計劃今夏出售杜格拉斯雷斯「止蝕」，紐卡素有意接貨。
杜格拉斯雷斯效力維拉期間表現出色，一度成為各大豪門爭奪目標，但佢加盟祖雲達斯後，演出嚴重走樣，已被教練莫達打入冷宮。杜格拉斯雷斯唔只冇努力提升狀態，更加經常夜蒲，祖雲達斯上場聯賽0比4輸畀阿特蘭大後，有球迷影到杜格拉斯雷斯喺夜店玩到凌晨1點半都唔願走。祖記為免呢位中場身價「清零」，希望今夏盡快賣走佢，只要有球會出到3,500萬歐元(約3億港元)轉會費，就會放人。
據悉紐卡素方面認為杜格拉斯雷斯唔適應意甲風格，導致影響發揮，睇好佢重返英超可以恢復水準，所以有意簽入佢，夥拍祖連頓、般奴古馬雷斯組成巴西中場線，兩間球會有望一拍即合。
