東網電視
更多新聞短片
艾登希雲面臨長抖。
曼聯喺英超3比0大勝李斯特城，不過都唔係全部好消息，賽前獲領隊魯賓艾摩廉點名大讚嘅中堅艾登希雲，今場首度喺英超正選上陣，點知踢50分鐘就嚴重受傷要瞓擔架離場，將面臨長時間休戰。
18歲嘅艾登希雲喺1月份由阿仙奴加盟，表現大獲好評，今場首度喺英超正選上陣擔任左中堅，可惜下半場早段一次喺底線爭位，懷疑扭傷足踝同膝頭，經治療後要由擔架抬走。據報艾登希雲完場後被見到要着保護靴，但至少唔需要拐杖輔助。
魯賓艾摩廉賽後透露：「好難知道佢咩情況，因為當佢受傷倒地嗰陣，佢唔識得交代個情況，可能因為希雲仲好後生，好難明白佢嘅感受。」曼聯本身已有哈利馬古尼、約羅、利辛度馬天尼斯、勞基梳爾等傷兵，後防人手捉襟見肘。
