東網電視
更多新聞短片
丹般恩成紐卡素奪冠英雄。(Getty Images)
紐卡素喺英聯盃決賽被睇淡下，2比1擊敗利物浦捧盃，先開紀錄嘅丹般恩賽後獲選為決賽最佳球員。呢位32歲老將上周五(14日)首次獲英格蘭國家隊徵召，唔夠3日就入波帶領紐卡素奪冠，經歷最夢幻72小時，難怪丹般恩賽後表示唔敢瞓覺，怕會突然「夢醒」。
丹般恩完場後興奮慶祝，喺更衣室瘋狂跳舞，佢賽後訪問表示：「我唔敢去瞓覺，因為我覺得依家好似發緊夢，一切都只係謊言，依家感覺好奇怪，好似有啲麻木。不過聽朝我會準時朝早8點，第1個去到英格蘭國家隊報到！」
丹般恩今場接應角球頂入，領隊艾迪侯域透露賽前不斷練習：「為呢場決賽我哋練咗兩個星期死球，但如果你有睇，唔會相信丹般恩入到波，因為佢冇一次成功，今場佢終於成為球隊嘅巨人！」丹般恩就話：「當時我覺得可以跳贏麥亞里士打，我唔係成日入波，或者就係要留喺最重要嘅場合先至入！」
