東網電視
更多新聞短片
美斯受傷對阿根廷打擊極大。(Getty Images)
阿根廷周二(18日)公布世盃外大軍名單，「球王」美斯意外落選，雖然佢周一(17日)先至為國際邁亞密踢足全場兼入波，但賽後就報稱大腿肌肉撞傷，無緣嚟緊對烏拉圭同巴西兩場重量級賽事，國際邁亞密對美斯嘅使用亦受到批評。
阿根廷目前喺世盃外排榜首，前6名出線位置非常穩陣，不過今輪作客烏拉圭同迎戰死敵巴西，賽事份量始終強勁，而且阿根廷有望提前鎖定明年決賽周資格，所以美斯嘅突然退隊，仍然引起阿根廷球迷震驚同不滿。
37歲嘅美斯今季喺國際邁亞密嘅上陣安排亦受到質疑，開季曾經7日內連續踢3場，結果之後因「工作量控制」連抖3場，上星期喺中冠盃嘅例行公事後備復出後，上場美職對阿特蘭大聯又踢足全場，消息指佢喺下半場被撞傷，但仍帶傷踢到尾，結果搞到阿根廷「埋單」。
國際邁亞密主帥馬斯真蘭奴表示：「我哋控制美斯嘅比賽負擔，令佢嘅不適唔會變成傷患，阿根廷國家隊嘅軍醫當然都有同我哋嘅醫生聯絡，我冇份參與佢哋溝通，如果有問題都可以搵我，但我相信冇呢個需要。」
