東網電視
更多新聞短片
沙治奧拉莫斯被質疑故意食紅牌。
西班牙「茅王」沙治奧拉莫斯上月進軍墨超，加盟勁旅蒙特雷，不過周一(17日)爆出爭議。38歲嘅拉莫斯喺作客3比1贏普馬斯一仗，完場前無故踢對手屁股被逐，賽後更喺社交網輕佻為自己再次拎紅牌「認叻」，被質疑係故意被逐。
沙治奧拉莫斯加盟蒙特雷後，今場係第5次上陣，而且已經入咗3球波，但喺3比1贏普馬斯兼去到最後補時，呢位老將爭波後突然抽水踢對手屁股，難逃食紅牌命運，亦係佢球員生涯第30張紅牌。
本來食紅牌都冇太大問題，但沙治奧拉莫斯賽後竟然喺社交網認叻：「好明顯我唔可以唔拎紅牌就離開墨西哥！」呢番言論令人質疑佢係故意食紅牌，而且今次被逐後，沙治奧拉莫斯要喺3月30日對迪祖亞拿停賽，當日就係呢位西班牙名將嘅生日，唔通想學尼馬「自製假期」？
