東網電視
更多新聞短片
普斯迪高路多次同熱刺球迷衝突。
熱刺上場聯賽作客吞富咸兩蛋，喺聯賽跌到落第14位，球迷不滿聲音日益高漲，據報領隊普斯迪高路喺離場嗰陣，再次同球迷發生口角，要職員幫手將佢推走。消息指熱刺暫時未有換帥計劃，但已做定準備，將兩位英超領隊列為可能繼任人選。
熱刺輸畀富咸後，隨隊作客嘅熱刺球迷不斷謾罵，馬菲斯泰爾就被影到走去球迷區呼籲支持球隊，不過普斯迪高路就冇咁好老脾，被鬧後先企定怒睥球迷，職員見到想將佢拉走，但普斯迪高路仍然出口還擊，最後喺泰爾等人幫手調停下化解。
事實上，普斯迪高路已經唔止一次同球迷衝突，上季尾就鬧爆球迷要求熱刺「輸畀曼城」阻阿仙奴爭冠；今季季初輸畀般尼茅夫後又同球迷鬧交。據英國《每日電訊報》消息，雖然熱刺認為傷兵係球隊戰績低落最大原因，所以暫時唔會炒普斯迪高路，但如果之後形勢惡化就會再次考慮。熱刺已鎖定般尼茅夫領隊伊拉奧拿，同埋富咸領隊馬高施華為新領隊目標。
