東網電視
更多新聞短片
巴西冇尼馬成績大跌。(Getty Images)
巴西前鋒尼馬近年傷患不斷，連巴西國家隊嘅成績亦急速「插水」，呢位33歲前鋒最近又再因傷退出國家隊，無緣出戰對哥倫比亞同阿根廷兩場大戰。有統計顯示，自尼馬成為巴西國腳後，巴西喺尼馬缺陣嘅比賽，勝率只得5成多啲。
尼馬喺2010年8月首度代表巴西，喺佢上陣嘅128場比賽，巴西有高達72%勝率，輸波率只得9.4%，不過喺尼馬缺陣嘅64場賽事，巴西勝率急跌至54.7%，輸波率就勁升至20.3%。巴西喺今屆世盃外掙扎嘅表現，同尼馬缺陣有莫大關係。
巴西中場般奴古馬雷斯，對尼馬再次受傷退隊表示失望：「我哋會掛住佢，唔單止係球員，球迷都好想再見到佢代表巴西。尼馬係巴西嘅領袖、10號，同埋近10年最佳球員，希望佢盡快康復，佢嘅缺陣對巴西係重大打擊。」
