東網電視
更多新聞短片
域陀奧森漢係豪門搶手貨。(Getty Images)
尼日利亞前鋒域陀奧森漢係球壇搶手貨，上年轉會車路士臨門撻Q後，今季外借去加拉塔沙雷繼續有出色表現，據報獲曼聯等多間豪門斟介。加拉塔沙雷副會長表示，奧森漢將會喺4月份決定去向，一眾豪門引頸以待。
加拉塔沙雷副會長卡禾古表示：「奧森漢通知我哋，佢會喺4月份宣布下季去向。目前，全世界最好嗰5間球會都斟緊佢，佢嘅加盟令加拉塔沙雷夢想成真，依家佢係其他球隊嘅夢想。加拉塔沙雷都係頂級球會，否則奧森漢都唔會嚟，佢繼續留低嘅機會唔會外面講到咁冇可能。」
奧森漢嘅借用合約6月完結，到時佢就要返拿玻里，不過消息指拿玻里亦希望「速戰速決」，盡快將佢賣走，避免上年拖到最後一刻先外借嘅尷尬情況重演。
除曼聯將佢列為收購主要目標之外，車路士、利物浦、祖雲達斯等勁旅都對佢虎視眈眈。奧森漢嘅國家隊友杜斯特伊岡就爆料：「我知佢係車路士球迷，但佢同所有頂級球會都傾過，除咗英超之外，我睇唔到佢會去其他聯賽。」
