东网电视
更多新闻短片
域陀奥森汉系豪门抢手货。(Getty Images)
尼日利亚前锋域陀奥森汉系球坛抢手货，上年转会车路士临门挞Q后，今季外借去加拉塔沙雷继续有出色表现，据报获曼联等多间豪门斟介。加拉塔沙雷副会长表示，奥森汉将会喺4月份决定去向，一众豪门引颈以待。
加拉塔沙雷副会长卡禾古表示：“奥森汉通知我哋，佢会喺4月份宣布下季去向。目前，全世界最好嗰5间球会都斟紧佢，佢嘅加盟令加拉塔沙雷梦想成真，依家佢系其他球队嘅梦想。加拉塔沙雷都系顶级球会，否则奥森汉都唔会嚟，佢继续留低嘅机会唔会外面讲到咁冇可能。”
奥森汉嘅借用合约6月完结，到时佢就要返拿玻里，不过消息指拿玻里亦希望“速战速决”，尽快将佢卖走，避免上年拖到最后一刻先外借嘅尴尬情况重演。
除曼联将佢列为收购主要目标之外，车路士、利物浦、祖云达斯等劲旅都对佢虎视眈眈。奥森汉嘅国家队友杜斯特伊冈就爆料：“我知佢系车路士球迷，但佢同所有顶级球会都倾过，除咗英超之外，我睇唔到佢会去其他联赛。”
