東網電視
更多新聞短片
艾寧夏蘭特近9場國際賽入12球。
周日(23日)凌晨世盃外歐洲區，挪威喺I組第1擊有個完美開始，作客5比0大炒摩爾多瓦，艾寧夏蘭特又入波延續佢喺國家隊強勁走勢，繼續向出戰世盃決賽周美夢進發！
挪威對上一次踢世盃決賽周係1998年，2年之後先係艾寧夏蘭特出世，上屆世盃外呢位曼城前鋒缺陣多場賽事，結果功虧一簣，不過夏蘭特近期狀態大勇，令挪威再燃起進軍世盃雄心。
挪威喺I組對手唔強，以色列、摩爾多瓦同愛沙尼亞實力都唔及挪威，只有未落實嘅意大利或德國係傳統勁旅，挪威喺小組坐亞望冠，如無意外至少有得踢附加賽。
今場作客摩爾多瓦，夏蘭特、阿歷山大索洛夫等5人各入1粒，贏5比0旗開得勝，夏蘭特攻入佢喺國家隊40場第39球，亦係近9場國際賽第12球，狀態勁弗。
夏蘭特表示：「我哋已經再冇失敗嘅藉口，今輪要全力以赴拎足晒6分，確保可以進軍世盃決賽周，呢個係所有挪威球迷嘅願望。」
